صباح الخير ولا مساء الخير اللي يعجبكم

من زود قلة الولف على اللي شفته والصدمة اللي انا فيها منيب قادر اعبر عن نفسي وعن مشاعري الفياضة كالعادة !! والسبب هو كالتالي :

بعد اسبوع من المشاكل مع الانترنت بين شركة سعودي نت وشركة الاتصالات السعودية وكلن يرمي التهم على الآخر مع انهم شركة وحدة !!!! انفصل عندي النت من الساعة 2 بالليل يوم 15 شعبان ولا رجع الا الساعة 3 الظهر ” علشان اكون معكم واقعي وصادق ماجربت الا بعد ماوصلت من الدوام ”

على العموم الحلم اللي عشته كان في عصر اليوم نفسه وماكنت مصدق وش كنت اشوف ولا مصدق اللي يصير لي .. هنا !! في السعودية ؟؟ وبهالشكل !! وبهالطريقة !!!!!

شوف الصورة الأولى وطالع في التدرج البياني لحزم البيانات اللي جاية وبعدين شوف تحت فوق شريط المهام Task bar

وشوف الحلم لما استمر معي وين وصلت فيني !!

شكلها ماصورة الانترنت حقهم انكسرت عليهم وهذا الطوفان اللي جاني

حبيت أشارككم هالحدث .

أحمد

سلام عليكم ورحمة الله وبركاته

فكرت امس اني عملية مسح لصورة عن طريق الماسح الضوئي ( Scanner ) وبغيت اعدل عليها و اضيف عليها بعض المرشحات ( Filters ) و الإضافات ( Addons ) علشان اسوي بعض الاثارة عليها ! جربت البرنامج اللي مركب عندي مسبقا على الجهاز وهو ACDsee لكن امكانيات التعديل حقه كانت بسيطة جداً جداً ، جاني إكتئاب علشان تذكرت انه لازم اركب Adobe photoshp على جهازي علشان اسوي هالاشياء وتذكرت كم من المساحة و الوقت ومن موارد الجهاز حقي راح يستخدمه ، فعقدت العزم اني ادور لي على حل بديل لهالشي اللي يطلع ضغط لاب توبي المتواضع في مواصفاته ويستنزفه لآخر قطره لدرجة اني اذا شغلت Adobe photoshop ما افكر اشغل اي حاجة ثانية على الجهاز علشان لا يتوقف العمل ويعلق .

المهم ما اطول عليكم بعد بحث دام لساعات وجدت هذا البرنامج الممتاز … تخيل برنامج يقوم بما يقارب 85 بالمية او اكثر من عمل الفوتوشوب ويقبل كتابة اللغة العربية و حجمه 1 ميقا و 300 كيلوبايت فقط لاغير … ايوه صدق بس 1.3 ميقا و أكثر من كذا البرنامج مجاااااااااااااااااااااااااااااااااااااااااااااااااااااااااااااااااااااااااني ببلااااااااااااااااااااااااااااااااااااااااااااااااااااااااااااااش يعني فك نفسك من سالفة كراك وما كراك وتسجيل وهالكلام كله .

تكملة الموضوع »

سلام عليكم ورحمة الله وبركاته

ومساء الخير عليكم جميعاً يا حلوين في برنامجنا دودي شو لتعليم الكمبتوتر …

اليوم راح نعلمكم حاقة قميلة أوي ومفيدة أوي أوي وحتعقبكوا أوي أوي .. بس علشان تستفيد منها يا أبو الشباب لازم بدك تكون محمس ! وروئ بالك … لك شوبنا تحياتي للجميع و ياهلا فيكم في كلاس اليوم

درسنا اليوم هو كيف تركب Windows و وحدة من توزيعات Linux على هاردسك واحد والدرس من المستوى المتوسط … هنا متطلبات العملية علشان تستعد لها قبل لا نبدأ بأي شي :

 إعمل نسخة احتياطية Backup لنظام التشغيل الحالي حقك . أهم خطوة في الموضوع كله علشان يمدينا نرجع اذا حدثت اي مشكلة ويمديك تسوي هالشي عن طريق برامج كثيرة منها Norton Ghost و Acronis Image server Enterprise

طيب وش الويندوز اللي راح نستخدمه وتوزيعة اللينكس اللي راح نستخدمها ؟ طبعاً بالنسبة للويندوز مايفرق اي ويندوز سواءاً XP أو Vista بس لازم أحدد احدهما علشان نكمل فيه الشرح وراح اذكر الخطوات المطلوبة على النظام الثاني باذن الله و إن شاء الله راح نعتمد الفيستا علشانه اخر اصداره لنظام تشغيل من مايكروسوفت .

أما بالنسبة لتوزيعة اللينكس راح أستخدم توزيعة BackTrack2 المخصصة لأمن المعلومات .. أنا ماراح اتكلم عنها وعن مزاياها لانها معروفة للمهتمين فيها واذا تبي اي معلومات اضافية عنها بمديك تروح للموقع التالي … إضغط هون .

طيب بالنسبة للمساحة لكلا النظامين كم يحتاج كل نظام ؟ خلنا نقول عندك 80 قيقا بايت راح نخلي 50 للفيستا و 30 قيقا للباك تراك والمساحة اللي اعطيناها للباك تراك مو علشان نظام التشغيل ,, لا! علشان استخدامك للتوزيعة نفسها ولا نظام التشغيل ماراح ياخذ شي .

جهزت العدة يبو ؟ تبينا نبدأ ؟ أتمنى انك ما نسيت تسوي نسخة احتياطية ! يلله بسم الله وعلى الله توكلنا :

تكملة الموضوع »

سلام عليكم ،،،

الموضوع تراه تقني شوي وراح يكون من تقني - مبتدئ

وهو بخصوص تغيير عنوان IP الجهاز الخاص فيك إذا كنت تشتغل على نظام التشغيل Sun Solaris 10

طيب خلنا نفرض سيناريو معين :

أنت الحين حاط Static IP أو مايسمى عنوان ثابت وكنت معطيه العنوان التالي 10.10.1.1  و سافرت لجدة مثلاً و حجزت بفندق(قوي) و طلع عندهم وصلات انترنت بالغرف و سألت عن IP range أو ما يسمى بمدى العناوين الممكن استخدامها قالوا لك احنا شغالين على المجال 192.168.1.XX وانت طب وتخير من هالعناوين . و على أساس إنك أخترت العنوان 192.168.1.10 راح تتطلب عملية التغيير بعض من الوقت و الجهد أيضاً الله يعطيك العافية من الحين .. والمطلوب كالتالي :

غير الملفات التالية لتتناسب مع العنوان الجديد :

/etc/hosts
/etc/inet/ipnodes
/etc/netmasks
/etc/defaultrouter

وغير القيم من العنوان القديم للعنوان الجديد وذلك عن طريق استخدام الأوامر التالية لفتح الملفات عن طريق المحرر vi أو gedit .. ومثال ذلك

gedit /etc/hosts

or

vi /etc/hosts        ما انصح باستخدامه لأنه صعب التعامل معه للمبتدئين ولكن راح تضطر تستخدمه لما تكون تستخدم terminal connection

إلى هنا و انتهت العملية مبروك عليك عنوانك الجديد

تساؤل بسيط :

هل كان من الصعب على Sun Microsystems جمع هالملفات كلها في ملف واحد فقط و أخذ القيم من هذا الملف ؟!! ولله في خلقه شؤون .

الله يخلي مايكروسوفت ! و أنت كمدير شبكة بعض الأحيان ماعندك الوقت الكافي حتى تحك شعر راسك فما بالك بتغيير عنوان سيرفر ! وبهالطريقة الحلوة

أكمل معكم لاحقاً في حلقة تغيير إسم الجهاز في Sun Solaris 10

تشاو

أحمد

بصراحة أنا قريت مقال في موقع كورة ومفاده كالتالي :

 ذكرت وسائل الاعلام الصينية اليوم السبت أن الشرطة المحلية هددت باتخاذ إجراءات صارمة ضد جماهير كرة القدم التي قد تهتف بالالفاظ البذيئة خلال المباراة الودية التي ستجمع فريق برشلونة الاسباني الشهير بفريق العاصمة الصينية بكين جوان غدا الاحد حيث تكثف المدينة مجهوداتها لتهذيب سلوك جماهيرها قبل دورة الالعاب الاوليمبية الصيفية التي تستضيفها العام المقبل.وصرح ليو تشونجيانج المتحدث الرسمي باسم الشرطة الصينية لوكالة الانباء الصينية الرسمية “شينخوا” قائلا “إن كل من ينوون الهتاف بالالفاظ البذيئة أو تحريض الجماهير على السب بشكل جماعي سيتم استبعادهم من الاستاد وسيواجهون عقوبة تصل إلى الحبس والحرمان من مشاهدة مباريات كرة القدم في الملاعب لمدة 12 شهرا”.

اللي يقرأ الخبر طبعاً بيقول عندنا وعندهم خير بس انا في نفس اليوم قريت في موقع اخر انهم يبون يهذبون الناس علشان أولومبياد بكين 2008 ! لاحظ انه مافيه شي بالغصب مثل ماقال الشرطي ! ولا فيه شي بالفرض !!

أنا عجبتني الفكرة بصراحة ,,,, ليش مايجربونها عندنا ويكون التطبيق بدون فرض أو غصب! علشان الواحد يروح يفكر يحضر مباريات بالملعب حتى لو المستوى مش ولا بد بس على الاقل فيه مكان الواحد يروحه  .

عنوان المقال الأصلي

و أخيراً أزاحت شركة كاسبيرسكي الروسية الوشاح عن الإصدارة الجديدة من طقم الحماية الكامل الخاص بها والموجه للمستخدمين المنزليين .

في هذي الإصدارة أضافوا بعض الخصائص اللي كانت في السابق تشكل عيوب في طقم الحماية الخاص فيهم ومن أهم الخصائص التالي :

• تحسين الجدار الناري و دمجه مع IDS/IPS
• إضافة الرقابة الأبوية
• تحسين واجهة البرنامج
• حماية من جميع انواع الروت كيت Rootkit “راجع المقالة اللي كتبتها في بي سي ماقازين شهر اغسطس 2006″ أو إضغط هنا

تحمست وتبي تركب البرنامج على جهازك ؟ طيب …. اتبع التعليمات التالية ” طبعاً الصور يا غشيم ” بس قبل تتابع الصور يالذهين … وين البرنامج ؟ ومن وين بتحمله ؟؟
تكملة الموضوع »

سلام عليكم ورحمة الله وبركاته ،

مالي نص ساعة جاي من صلاة الجمعة واللي دايم انتقد امام مسجدنا فيها …

طبعاً إمام المسجد مدرس و ألحين بإجازة ورايح الديرة ومخلي أخوه الإمام الله يجزاه خير . طبعاً أنا ماعندي مانع أخوه يصير الإمام مافيه مشكلة أكيد خصوصاً إذا كان موافق للشروط المعروفة للإمامة ولا أنكر عليهم فكرة مشروع إمام مستقبلي و أخوه من الحين يهيأه لها الشي فكرة طيبة والله.

لكن أنا مشكلتي معهم مهوب هنا ، مشكلتي معهم في خطبة الجمعة .

الإمام و أخوه جزاهم الله خير يجونك صلاة الجمعة وكل واحد معاه ورقه ماخذ أصعب الكلام من أمهات الكتب اللي للفقهاء و العلماء ويجي يلقيها على جمهور أغلبه إن لم يكن 98 بالمية منهم لا يفهمون وش قاعدين يقولون هالأخوان .

 تخيل معي المنظر هذا امام لجمهور من الناس 50 بالمية منهم من غير المتحدثين للغة العربية و 30 بالمية شياب وكبار في العمر و 10 بالمية تحت 15 و 10 بالمية شباب وناس عاقلين ، و الأخ جالس يقرى عليك المقتطفات اللي جايبها من أمهات الكتب !!

 كم واحد بيستفيد من هالخطبة ؟

كم واحد من اللي محتسبين الأجر وحاضرين الخطبة بدري بيقدر يفهم الكلام الصعب اللي جالس يجيبونه الإخوان من كتب لها وزنها !!

هل فكروا في الجمهور اللي يجي يصلي وراهم ؟

هل أحاديثهم تواكب مشاكل الحي ؟ مشاكل المنطقة ؟ مشاكل البلد ؟ مشاكل العالم العربي والإسلامي ؟

ولا الموضوع مجرد قراءة للمصطلحات الصعبة والقرائة الانشائية و أداء الواجب فقط لاغير؟!!!

أذكر مرة صليت الجمعة في مسجد حارتنا هذا وللأسف كنت متأخر يمكن مالحقت الا اخر ربع ساعة … كان فيه امام يخطب خلاني اتحسف اني جيت متأخر على خطبة الجمعة . أول مرة بحياتي بعد وفاة الشيخ عبدالعزيز الجوير الله يرحمه احس بخطبة جمعة انها مفيدة لي ، بسيطة بكلماتها كبيرة بمعانيها . والله كان الكلام سلس وبسيط حتى أحد الإخوان الباكستانيين سألني بعد الصلاة من هذا الإمام وش إسمه ؟ مرة كويس . قلت له والله ما أعرف وانا مثلك ابي اعرف اسمه . مرت علي 3 ايام وانا اتكلم عن هذا الامام وكيف خطبته كويسة و مشوقة وتضرب في الوتر الحساس وتحسه يتكلم معك شخصياً ويتكلم مع عقلك و يتكلم معك عن الوقت الحالي والمستقبل و هذا اللي مفروض يصير وانا اعشق هالطريقة بالنقاش والتحدث العقل ثم العقل ثم العقل . . إستمرينا مع هالشيخ لمدة 3 اسابيع ورى بعض و أنا أحضر صلاة الجمعة من قبل آذان الخطبة بعكس الجمع الأخرى اللي كنت اجيها قبل الإقامة بشوي لتأدية واجب صلاة الجمعة مع الجماعة والله عالم بهالشي . و بعد

أنا بعض الأحيان أفكر مع نفسي ( لأنه بالأصح ما ودي أسأل أحد لأنه الإجابة مبهمة ولا غير معروفة من أصله ) لما يفكرون يعينون شيخ لمسجد لهذا المسجد او ذاك مافكروا في انه صلاة فيه صلاة جمعة وفيه القاء على جماهير من البشر و من مختلف الجنسيات بحكم ان ديننا الاسلامي دين عالمي والمفروض حاطين في بالهم هالشي ! مايشوفون قدرات الإخوان اللي راح يشغلون هالأماكن ؟ ما أنكر إنه القدرات متفاوتة بس إحنا بعد ما نبي قراءة من كتب بس ! ونبي إمام إذا انتقدته في شغلة معينه مثل هذي ما يصد عنك !!!!َ!!!!!!!!!! ولا مايشوفك انك كفؤ لانتقاده لانك منت ملتحي ومنت مقصر ثوبك .

تمر صلاة الجمعة اسبوع بعد اسبوع واحنا مانستفيد من هالعيد الأسبوعي لأن باين على حضرتهم يقرئون لأنفسهم في كل جمعة .

أنا مستاء ..

أحمد

أترككم مع المتعة !

تخيل نفسك مكانهم لوول

 أعتذر عن ظهور بعض المناطق ” لو الموضوع بيدي كان قصصت المشهد وخليته ثانيتين بس .. حشى الفناة الأولى لول

من جد تخويف لا تفوتكم الإعادات لوول

لا يفوتكم أنواع الضحك على المسابقات

صباح الخير . الحين الساعة الواحدة و الخمسون دقيقة بعد منتصف الليل ( حركات )

أكيد كثير منكم يبون يحطون مقاطع من الموقع المشهور YouTube بمدوناتهم علشان يصيرون حركات مثل خويي إبراهيم . بس المشكلة الغالبية ما يعرفون مثل صديقي القوي هذا . ماعليكم خلوها علي .

ما أبي أطول بالحكي .. أنا لقيت اللي محتاجينه علشان تحققون مبتغاكم ” ياشين اللي توه قاري جريدة بعد العشاء ” لقيت إضافة سهلة وبسيطة راح اشرح لكم طريقة تركيبها وطريقة عملها .. مستعدين ؟؟

Let’s GO :

1. حمل الإضافة من هالوصلة هنا
2. فك الملف المضغوط وارفع المحتويات إلى المجلد الخاص بالإضافات في المدونة حقك وبالعادة يكون wp-content/plugins
3. أدخل لوحة التحكم الخاصة بالمدونة حقك وفعل الإضافة عن طريق إضافات وبعدين إختار تفعيل للإضافة YouTube

ألحين حنا انتهينا من التركيب … بيجي واحد مستعجل منكم بيقول طيب يا أبو حميد شلون نستخدمها  ؟ طبعاً انا برد عليه وبكل ثقة بقول له بسيطة يابو الشباب انت سو التالي :

لما تجي تكتب موضوع اكتب كالتالي

[y o u t u b e  id] طبعاً بدون مسافات في كلمة youtube أنا حطيتها علشان لا يطلع أي فلم بديل لها . مافهمت إلى ألحين ؟ طيب بعطيك مثال  وهو كالتالي

[y o u t u b e CZrr7AZ9nCY] لا تنسى youtube بدون مسافات و id مثلاً تجيبه من وصلة المشهد حق يو تيوب خلنا نقول مثلاُ إن الوصلة هي http://www.youtube.com/watch?v=CZrr7AZ9nCY فراح يكون ال id هوCZrr7AZ9nCY .

طبعاً الموضوع لو تجربه بتلاقيه سهل جداً بس يبي له تطبيق …

شدوا حيلكم

أحمد

موقع المطور

أنواع الحش بـتقنية Microsoft Surface

جود مورنينج

حلو الواحد يخلي المدونة حقه شويه فيها حركة و اشياء تتحرك بدل الجمود اللي تتصف فيه معظم المدونات .. ومن الأشياء اللي تبعث على السرور والحركة في المواقع حركات الفلاش بس بعض الشبيبة مايعرف شلون يخلي مدونته فرايحيه شوي

خلاصة الكلام . جبت لكم إضافة تتيح لك إضافة الفلاش على كتاباتك و عليكم بالتالي للتركيب :

1. حمل الإضافة من هنا
2. فك الملف المضغوط وحمل المجلد kml_flashembed_wp_13 إلى المجلد الخاص بالإضافات في مدونتك وبالعادة يكون wp-content/plugins
3. أدخل إلى صفحة التحكم الخاصة بمدونتك و روح على إضافات راح تلاقي الإضافة Kimili Flash Embed موجودة قم بتفعيلها .

ألحين بنروح لطريقة الإستخدام :

إذا كنت تستخدم المحررات اللي تعتمد على ما تراه هو ماسوف تحصل عليه WYSIWYG فسوف تشاهد أيقونة أضيفت إلى شريط الأدوات ومن هنا يمكنك إضافة الفلاش .

أما إذا كنت مسوي فيها وتحب تعدل في الكود البرمجي في كتابات مدونتك عليك بوضع الآتي

  “[k m l_f l a s h e m b e d m o v i e =”/path/to/your/movie.swf” h e i g h t=”300″ w i d t h=”300″ /]”

 طبعاً بدون علامات التنصيص والمسافات بين الحروف لأني حطيتها علشان لا ينحاس الشرح ” إنتظروا علي شوي بس إلين ألاقي لكم تخصيص للكودات علشان الأمور تكون أوضح ” بس عليكم بالصبر والإحتساب .

عليك بتعديل المقاسات علشان يضبط عرض فلمك .

خلصنا خلاص ؟ لا ما بعد خلصنا تدري إن يمديك تحط أفلام اليوتيوب عن طريق هذي الإضافة !!! بس الطريقة يبي لها شوية حرفنة ، والطريقة كالتالي:

 إفتح الشفرة البرمجية حق مقالتك وحط في المكان اللي تبي هالكود البرمجي مع تغيير وصلة فلم اليوتيوب

<object width=”425″ height=”350″>
<param name=”movie” value=”http://www.youtube.com/v/crfrKqFp0Zg”></param>
<param name=”wmode” value=”transparent”></param>
<embed src=”http://www.youtube.com/v/crfrKqFp0Zg” mce_src=”http://www.youtube.com/v/crfrKqFp0Zg” type=”application/x-shockwave-flash” wmode=”transparent” width=”425″ height=”350″></embed>
</object>

تمنياتي لكم بالتوفيق و أشوف مدوناتكم عامرة بالفرح والحركة

أحمد

موقع المطور

سلام عليكم شباب و صبايا

في البداية أعتذر عن عدم تحديثي لمدونتي السابقة ، لكن أعدكم إن شاء الله في المدونة هذه بما أعتبره ترهات

بالنسبة للمواضيع السابقة سوف أعيد كتابة و صياغة المواضيع المهمة و المواضيع اللي مالها داعي سوف ترمى في سلة النسيان .

تهمني آرائكم في كل شي .

آسف مرة أخرى ، ولكم مني تحية .

أحمد